Poslovne vijesti - Makedonija

Добрите идеи под закрила на бизнис-ангелите

Десетина богати поединци им стојат на располагање со своите пари и со искуството на домашните претприемачи кои имаат фирми со голем потенцијал за раст, но поради ризикот, не можат да добијат банкарски кредити за да ги реализираат.

Тие се првите македонски бизнис-ангели, инвеститори кои својот капитал стекнат во секторот за информатичка технологија, градежништво, инвестициско банкарство и во медиумите сакаат да го вложат во квалитетни бизнис-идеи, а за возврат се стекнуваат со косопственички статус во фирмата. Нивните имиња засега се тајна, а како посредник меѓу нив и претприемачите со иновативни идеи се јавува Мрежата на деловни ангели на Македонија, која лани беше формирана од Центарот за иновации при проектот за конкурентност на американската агенција УСАИД.

Жарко Поп-Илиев, претседател на Центарот за иновации, вели дека тие се организација која им помага на бизнис-ангелите да ја донесат одлуката за да инвестираат, а на претприемачите како да се претстават пред нив.

- Претприемачот мора да има издржана идеја, да има подготвен бизнис-план, да има добар тим и сето тоа добро да го презентира. Им помагаме и во текот на преговарањето. Многу е битно да го сфатат процесот, сите мислат „ќе дојдам и ќе ми дадат пари“. Има фази на проверка, дали се водат судски парници против фирмата. Ние даваме поддршка, се обидуваме да ги приближиме, кога седнуваат на иста маса и ние сме тука и играме улога на олеснувачи. Но, на крајот на краиштата, одлуките се нивни, ние немаме право да се мешаме - вели Поп- Илиев.

Влезот на бизнис-ангел во одредена фирма не значи само дека ќе добие финансиски капитал, туку се добива и целото неговото знаење, искуство, познанства. Се смета дека најголемата вредност на бизнис-ангелите не е во парите, туку во социјалниот капитал што го носат со себе.

- Тоа се луѓе што го знаат бизнисот, знаат како да воспостават одредени процеси во фирмата, во управувањето и во контролата. Тие го вложуваат целиот социјален и финансиски капитал за да остварат добивка. Светските искуства покажуваат дека тоа не се долгорочни партнери. По неколку години нивниот удел го откупува или самиот претприемач или некој инвестициски фонд - објаснува Поп-Илиев.

Домашните фирми може да очекуваат инвестиции од 20.000 до 200.000 евра од македонските бизнис-ангели. Досега на адреса на Мрежата на бизнис-ангели пристигнале десетина барања од фирми од областа на образование, информатичка технологија, услуги, маркетинг и лесно производство.

- Организираме таканаречени инвестициски вечери каде што претприемачите ги презентираат своите идеи пред потенцијалните инвеститори. Тие пополнуваат анкетно ливче за што се заинтересирани, а потоа организираме втора средба каде што во поблизок разговор бизнис-ангелот ќе ги разјасни сите прашања - вели Поп-Илиев.

Светската економска криза е главната причина поради која с` уште не е склучен ниту еден договор за вложување. Во Словенија, чија мрежа на бизнис-ангели ја помага нашата, лани немало склучено ниту еден договор, за разлика од претходните четири години кога биле финансирани дури осум проекти.

- Три проекти дојдоа до завршна фаза, речиси до преговори за потпишување договори. Но, за жал, ниту една не се оствари. И самите бизнис-ангели лани почнаа да ги чувствуваат во своите фирми последиците од економската криза во светот и малку беа неодлучни. Kога се има проблем и во својата фирма, не се размислува да се шири бизнисот - вели Поп-Илиев.

Бизнис-ангелите како извор за финансирање на малите и на средните фирми беа истакнати како еден од моделите на неодамнешната промоција на владината Програма за поддршка на малите и средните претпријатија. Со неа Министерството за економија годинава со 217 илјади евра ќе ги зајакнува конкурентноста, претприемништво и иновациите на малите и на средните фирми.